KONTE MIAMI-DADE PREZANTE MIZAJOU APRE SIKLÒN MILTON

Pandan Konte Miami-Dade ap sipòte efò sekou nan tout Eta a apre siklòn Milton, nou rete angaje pou kenbe rezidan nou yo enfòme avèk mizajou ki fèt a tan sou fonksyònman depatman yo, mezi sekirite, ak resous ki disponib.

Majistra Konte Miami-Dade la, Daniella Levine Cava te deklare: “Sekirite ou se toujou pi gran priyorite nou. Nou rekonesan anvè tout mesye dam nan plizyè ekip Konte nou an, ak patnè kominotè nou yo, ki te ede fè nou rete an sekirite e enfòme tout pandan evènman sa a. A tout rezidan nou yo: Mèsi dèske nou te koute apèl nou te lanse yo, dèske nou te prepare. Tanpèt sa a se yon rapèl sevè kòman li esansyèl pou nou rete prepare pandan tout sezon siklòn nan – paske nou kontinye wè plis trè gran siklòn ak tanpèt ki entansifye rapid, epi ti chanjman piti nan previzyon meteyo a fè yon kokennchenn diferans.” 

Byen bonè maten an, ekip sekouris Florida Task Force One (FL-TF1) sèvis Rechèch ak Sekou Iben (US&R) Depatman Sekou Ensandi Miami-Dade (MDFR) te deplwaye nan zòn Tampa pou ofri sipò esansyèl, tankou operasyon rechèch ak sovtaj, evalyasyon enfrastrikti ak distribisyon sekou, epi Depatman Lapolis Miami-Dade pral voye Fòs Deplwaman Rapid (RDF) pa li demen maten.

Men mizajou depatman Konte Miami-Dade yo:

• Depatman Dlo ak Egou: Sistèm dlo ak egou yo kontinye fonksyone nòmalman; sepandan, biwo Depatman Dlo ak Egou Miami-Dade (WASD) fèmen jodi a.
• Depatman Transpò ak Travo Piblik: Sèvis transpò piblik, tankou Metrorail, Metrobus, ak Metromover rete ouvè aktyèlman epi yo kontinye ap travay nòmalman.
• Depatman Jesyon Dechè Solid: Sant Dechè ak Resiklaj Konte a rete ouvè dapre orè travay regilyè ki te tou pwograme jiska 5:30 p.m. Apati jedi 10 oktòb 2024:
  • Tout enstalasyon eliminasyon fatra ap fonksyone dapre orè regilyè ki te tou pwograme.
  • Sèvis ramasaj gwo dechè pral rekòmanse.
  • Pa pral gen ramasaj fatra oswa resiklaj sou twotwa.
    • Pwochen ramasaj fatra ki pwograme pou kliyan yo va fèt lendi 14 oktòb.
    • Nou va ofri ramasaj resiklaj samdi 12 oktòb pou rezidan ki te nòmalman pwograme pou ramasaj resiklaj jodi a. Nou konseye rezidan yo pou yo mete poubèl ble pou resiklaj yo a sou twotwa vè 7:00 a.m samdi pou ramasaj.
  • Ekip kontwòl moustik yo pral repran fonksyònman nòmal demen.
• Pak, Rekreyasyon ak Espas Ouvè: Tout lokal pak ak espas ouvè konte a re-ouvè a 12 p.m. jodi jedi 10 oktòb la. Zoo Miami ak tout pisin konte a va re-ouvè demen.
• Bibliyotèk: Bibliyotèk konte yo ap rete fèmen, epi yo va re-ouvè vandredi 11 oktòb dapre orè travay nòmal.
• Sèvis Animal: Depatman Sèvis Animal (ASD) ouvè pou sèvis adopsyon ak akèy nan lokal Doral ak Medley de 10 a.m. a 6:30 p.m.
• Ayewopò Entènasyonal Miami: MIA rete ouvè epi l ap travay, byenke gen kèk vòl ki anile. Nou ankouraje vwayajè yo pou yo konfime eta vòl pa yo anvan yo ale nan ayewopò a.
• PortMiami: Pò a, pon pò a ak tinèl la, tout ouvè. Vwayajè yo ta dwe tcheke konpayi kwazyè pa yo pou mizajou sou itinerè yo.
• Gad Kòt Amerikèn nan pwosesis deblokaj tout pon mobil yo pou sikilasyon maritim. Nou prevwa sa ap fin konplete vè 10 p.m.

Lòt biwo ak sèvis non-esansyèl gouvènman Konte a ap rete fèmen jodi a epi yo ap re-ouvè demen.

Nou ankouraje rezidan yo pou yo rete enfòme pou dènye mizajou yo:

• Kontinye suiv medya lokal ak platfòm verifye medya sosyal yo.
• Enskri pou w resevwa alèt dijans gratis pa mwayen Miami-Dade Alerts nan miamidade.gov/emergency.
• Vizite miamidade.gov/milton oswa telechaje aplikasyon Ready MDC a pou plis enfòmasyon sou sekirite ak preparasyon pou siklòn.