Majistra Konte Miami-Dade la deklare Eta Dijans lokal an previzyon arive Siklòn Milton

An previzyon enpak potansyèl sou Konte Miami-Dade akòz Siklòn Milton, Majistra Konte Miami-Dade la, Daniella Levine Cava te deklare yon Eta Dijans Lokal ki an vigè imedyatman. Sant Operasyon Dijans lan va aktive nan yon Nivo 2 apati lendi a 7:30 a.m.pou kowòdone preparasyon ak efò alèjman.
 
Siklòn, Milton fèk pase nan Kategori 1, li nan sidwès Gòlf Meksik la e li ap deplase nan direksyon lès atravè Gòlf la. Malgre ke pa gen previzyon tanpèt la ap gen enpak dirèkteman sou konte Miami-Dade jiska mitan semèn nan, rezidan yo ta dwe konnen ke yo ka fè fas avèk gwo lapli ak inondasyon dimanch sa a, akòz yon twoub separe nan nòdès Milton.

Majistra Levine Cava te deklare: "Pa prekosyon, mwen deklare yon Eta Dijans lokal pou Miami-Dade pou asire ke nou konplètman prepare pou reponn a nenpòt defi ki ap vini.  "Deklarasyon sa a pèmèt nou mobilize resous rapidman, pwoteje rezidan nou yo epi kenbe kominote nou an an sekirite."

Konte Miami-Dade anba yon Siveyans pou Inondasyon sòti dimanch maten jiska jedi maten pandan yo prevwa gwo lapli nan kèk jou ki ap vini yo.  Lapli adisyonèl ki asosye avèk Milton, ki ka tonbe nan mitan semèn lan, ta kapab entansifye pwoblèm inondasyon ki deja egziste yo. Konte Miami-Dade ankouraje tout rezidan yo rete vijilan, pandan vag tanpèt danjere ak van ki ka lakoz gwo domaj yo vin de pli zan pli posib, menmsi li toujou twò bonè pou predi nivo egzak enpak la pou Miami-Dade.

Moun ka jwenn Eta Dijans lan, ti konsèy sekirite ak plis enfòmasyon sou preparasyon pou tanpèt isit la. 

Nou ankouraje rezidan ak vizitè yo pou yo prepare epi rete enfòme lè yo vizite: miamidade.gov/hurricane